[美食推介系列] 美孚 滄浪亭 - 美孚
成日都覺得美孚呢個地方慘慘地，附近既長沙灣、荔枝角都有好多好野食，向返新界方向，成個葵廣可以比你掃街，所以顯得美孚呢個地方好似無咁突出。不過，事實上，美孚唔似公屋商場得堆連鎖商戶，其實都有好多小店，好多local野，所以當然都不乏卧虎藏龍之秀。
今次介紹呢間餐廳，算係頗有名氣既小店，成日都排哂長龍既滄浪亭，食上海野為主，上次去都排左成20分鐘，叫做快架喇。
呢間野最出名就係嫩雞煨麵，咁當然要嗌返碗，50蚊呢個價錢，以麵而言算係唔平，不過見過份量都覺得物有所值，而味道就真係要重點介紹下。首先呢，個湯相當之特別，一般而言都係清雞湯黎既姐，反而佢係好creamy既，呢種奶油雞湯好滑，雖然勁大個碗，不過都想飲哂d湯佢，d麵又好索湯，啖啖都好滋味，另外個湯都有好多菜粒，食落去無一般忌麻湯咁膩，口感算係好平均，d雞粒就一如其名，嫩雞，食落去唔鞋口，而麵質呢都唔算硬，呢碗麵值得encore
至於另外一碗就係紅燒軟排麵，叫呢款都係為左穩打穩紮，個湯同d中高檔次既台灣牛肉麵既湯差唔多，未至於喜出望外既，不過個肉就真係非常之淋，唔需要太多力氣去咬開，都係正評之選。
食物: ★★★★☆
價錢: ★★★☆
環境: ★★☆
服務: ★★★
性價比: ★★★★
Search